Молитва святителю Луке, исповеднику, архиепископу Крымскому sv.luka_simferohlskiy.e.jpg

В многих болезнях приходится жить человеку. И у кого просить нам помощи, как не у Господа Нашего Иисуса Христа, Пресвятой Его Матери Богородицы Девы и у святых его? Святитель Лука Войно-Ясенецкий при земной жизни много помогал людям в болезнях их, помогает святой и сейчас молящимся к нему и просящим о помощи.

Молитва святителю Луке Крымскому

О, святителю Луко, исповедниче и угодниче Христов! Услыши нас, грешных, со умилением припадающих к раце честных и многоцелебных мощей твоих, и принеси молитву нашу к Милостивому Человеколюбцу Богу, Емуже ты ныне со всеми святыми предстоиши. Испроси у Христа Бога нашего, коемуждо дар благопотребен и вся, яже ко спасению полезная, да утвердит ны в вере Православней и благочестии, яко избавльшеся от козней лукаваго, избегнем всякия вражды, нестроений, ересей и расколов.

О, целителю предивный и врачу безмездный! Уврачуй благодатию, данной тебе от Бога, язвы душ и телес наших, да не неисцелени отыдем из сей жизни временней, но да чисти и непорочни предстанем Престолу Божию, прославляюще Отца и Сына и Святаго Духа во веки веков. Аминь.

Молитва святителю Луке Крымскому об иселении

О всеблаженный исповедниче, святителю отче наш Луко, великий угодниче Христов. Со умилением приклоньше колена сердец наших, и припадая к раце честных и многоцелебных мощей твоих, якоже чада отца молим тя всеусердно: услыши нас грешных и принеси молитву нашу к Милостивому и Человеколюбивому Богу. Емуже ты ныне в радости святых и с лики ангел предстоиши. Веруем бо, яко ты любиши ны тою же любовию, еюже вся ближния возлюбил еси, пребывая на земли.

Испроси у Христа Бога нашего, да утвердит чад Своих в духе правыя веры и благочестия: пастырям да даст святую ревность и попечение о спасении вверенных им людей: право верующия соблюдати, слабыя и немощныя в вере укрепляти, неведущия наставляти, противныя обличати. Всем нам подай дар коемуждо благопотребен, и вся яже к жизни временней и к вечному спасению полезная.

Градов наших утверждение, земли плодоносие, от глада и пагубы избавление. Скорбящим утешение, недугующим исцеление, заблудшим на путь истины возвращение, родителем благословение, чадам в страхе Господнем воспитание и научение, сирым и убогим помощь и заступление.

Подаждь нам всем твое архипастырское благословение, да таковое молитвенное ходатайство имущи, избавимся от козней лукавого и избегнем всякия вражды и нестроений, ересей и расколов.

Настави нас на путь, ведущий в селения праведных, и моли о нас всесильнаго Бога, да в вечней жизни сподобимся c тобою непрестанно славити Единосущную и Нераздельную Троицу, Отца и Сына и Святаго Духа. Аминь.

(Молитву составил настоятель храма Трех Святителей г. Симферополя протоиерей Георгий Северин)

Тропарь

Возвестителю пути спасительного, / исповедниче и архипастырю Крымския земли, / истинный хранителю отеческих преданий, / столпе непоколебимый, Православия наставниче, / врачу богомудрый, святителю Луко, / Христа Спаса непрестанно моли / веру непоколебиму православным даровати / и спасение, и велию милость.

Кондак

Якоже звезда всесветлая, добродетельми сияющи, / был еси святителю, / душу же равноангельну сотворил еси, / сего ради святительства саном почтен был еси, / и во изгнании же от безбожных много пострадал еси / и непоколебим верою пребыв, / врачебною мудростию многия исцелил еси. / Темже ныне честное тело твое, от земленых недр обретенное дивно, / Господь прослави, / да вси вернии вопием Ти: / радуйся, отче святителю Луко, / земли Крымския похвало и утверждение.

© 2015г Храм Всех Святых Спасского благочиния - Патриаршее подворье в Митино г. Москвы